ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

Համաձայն Հայաստանի Հանրապետության կառավարության 2025 թվականի փետրվարի 13-ի N 195-Ն որոշման (այսուհետ՝ Որոշում)՝ 2025 թվականի ապրիլի 1-ից մինչև ապրիլի 30-ը ներառյալ, մեկնարկում է գիտական հետազոտությունների և փորձարարական մշակումների աշխատանքները (R&D) որպես այդպիսին որակելու նպատակով հայտերի և դրան կից գիտական հետազոտությունների և փորձարարական մշակումների ծրագրի ընդունումը։

Հայտը և ծրագիրը լրացվում են գիտական հետազոտությունների և փորձարարական մշակումների ոլորտի ընկերությունների կողմից (Հայտատու) էլեկտրոնային եղանակով՝ Բարձրագույն կրթության և գիտության կոմիտեի private.hesc.am առցանց համակարգի միջոցով։

Հիշեցնենք, որ Որոշումը չի տարածվում ՀՀ պետական բյուջեից ֆինանսավորվող՝ կիրառական գիտական հետազոտությունների և փորձարարական մշակումների աշխատանքների վրա։

Հայտատուն համակարգում պետք է լրացնի հետևյալ տվյալները`

• անվանումը՝ հայերեն և անգլերեն,
• կազմակերպական-իրավական ձև (ՍՊԸ, ՓԲԸ, ԱՁ, ԲԲԸ, ՊՈԱԿ, ՈԱԿ),
• գրանցման հասցե,
• հարկ վճարողի հաշվառման համար (ՀՎՀՀ),
• տնօրենի անուն, ազգանուն, հայրանուն (Ա․Ա․Հ․),
• էլեկտրոնային փոստի հասցե,
• հեռախոսահամար,
• գործունեության նկարագիր,
• ծրագրի վերնագիր,
• գիտական հետազոտության և փորձարարական մշակումների աշխատանքի անվանումը՝ ըստ Հայաստանի Հանրապետության էկոնոմիկայի նախարարի 2013 թվականի սեպտեմբերի 19-ի N 874-Ն հրամանի 1-ին կետով հաստատված հավելվածով սահմանված տնտեսական գործունեության դասակարգչի նկարագրի
• գիտական հետազոտությունների և փորձարարական մշակումների իրականացման ակնկալվող սկզբի և ավարտի օրը, ամիսը և տարին,
• Հարկային օրենսգրքի ո՞ր հոդվածի, ո՞ր մասի, ո՞ր կետին (121-րդ հոդվածի 2-րդ մասի 4-րդ կետ, 123-րդ հոդվածի 2-րդ մասի 3-րդ կետ, 150-րդ հոդվածի 1.1 մաս) համապատասխանության պարագայում է ներկայացվում, ինչպես նաև
• Համակարգի «Ֆայլեր» բաժնում զետեղված Ձևով պահանջվող այլ տեղեկութուններ և փաստաթղթեր։

Հայտատուի հայտը և ծրագիրը մասնագիտական հանձնաժողովի կողմից որպես գիտական հետազոտությունների և փորձարարական մշակումների աշխատանքներ որակվելու դեպքում` Հայտատուն կկարողանա օգտվել ՀՀ հարկային օրենսգրքով սահմանված հետևյալ արտոնություններից, այդ թվում՝

• Շահութահարկի հաշվարկման նվազեցումներ,
• Ամորտիզացիոն մասհանումներ,
• R&D իրականացնող մասնագետների նկատմամբ եկամտային հարկի 10% դրույքաչափի կիրառում։

Գիտական հետազոտությունների և փորձարարական մշակումների աշխատանքները որպես այդպիսին որակելու համար Որոշմամբ սահմանվել է 5 հիմնական չափանիշ՝

• Նորույթի չափանիշ,
• Ստեղծարարության չափանիշ (ոչ բացահայտ հայեցակարգերի և հիպոթեզների վրա հիմնված լինելը),
• Վերջնարդյունքների անորոշության չափանիշ,
• Համակարգվածության չափանիշ (բովանդակային ծրագրումը և ֆինանսական նախահաշվարկը),
• Փոխանցելիության կամ վերարտադրելիության չափանիշ։

Համաձայն Որոշման՝ Հայտը և Ծրագիրը լրացնելու նպատակով համակարգը հասանելի է դառնում յուրաքանչյուր եռամսյակի առաջին ամսվա առաջին աշխատանքային օրվանից մինչև տվյալ ամսվա վերջին աշխատանքային օրը։

Հայտի ուղարկման հնարավորությունը private.hesc.am համակարգի միջոցով  կարգելափակվի ապրիլի 30-ին՝ Երևանի ժամանակով ժամը 18:00-ին։

Հարցերի դեպքում դիմել Բարձրագույն կրթության և գիտության կոմիտեի ԲԿԳՔՎ փորձարարական մշակումների և ինովացիոն ծրագրերի բաժին` 010 300109, +830։