ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

«Գիտուժ» նախաձեռնությունը ՀՀ ԿԳՄՍ նախարարության աջակցությամբ և Գիտությունների ազգային ակադեմիայի հետ համագործակցությամբ հոկտեմբերի 1-6-ը իրականացնելու է «Գիտության շաբաթ» նախագիծը, որը միտված է գիտության հանրահռչակման ազգային հարթակի ստեղծմանը։

Միջոցառման համար ֆինանսական միջոցներ է տրամադրել Բարձրագույն կրթության և գիտության կոմիտեն ՀՀ 2024թ․ պետական բյուջեի «Գիտական և գիտատեխնիկական հետազոտությունների ծրագրի» «Գիտության մասսայականացման աջակցություն» ծախսային ուղղությամբ։

Գիտության շաբաթն անցկացվելու է Երևանում և բոլոր մարզերում։ Այն հասարակության տարբեր շերտերի համար նախատեսված բազմաձևաչափ միջոցառումների շարք է, որի նպատակն է համազգային մակարդակով հանրահռչակել գիտությունն ու տեխնոլոգիաները, բացատրել վերջիններիս անփոխարինելի դերը և նշանակությունը ժամանակակից աշխարհում, գիտությունը դարձնել հրապուրիչ երիտասարդների համար, ինչպես նաև խթանել քննադատական մտքի և գիտելիքահենք դիսկուրսի զարգացումը:

Հայաստանում առաջին Գիտության շաբաթը խորհրդանշելու է գիտության և հասարակության միջև կապը՝ առաջնորդվելով «Մոտեցնել գիտությունը հասարակությանը» կարգախոսով:

Ապակենտրոնացված միջոցառումներ կանցկացվեն մանկապարտեզներում, դպրոցներում ու բուհերում, իսկ Երևանի Ազատության հրապարակում բոլոր 6 օրերի ընթացքում տեղի կունենա Գիտության փառատոն։

Փառատոնը բաժանված է լինելու 3 թեմատիկ մասերի.

   1. Գիտությունն ամենուրեք է (հոկտեմբերի 1-2),

   2. Մասնագիտական կողմնորոշում (հոկտեմբերի 3-4),

   3. Գիտական ֆանտաստիկա (հոկտեմբերի 5-6)։