ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

Մեկնարկել է «Հետազոտական աշխատանքների ֆինանսավորում» (Faculty Research Funding) ծրագրի միջազգային հայտերի ընդունումը։ Ծրագիրն իրականացնում է «Ձեռնարկությունների ինկուբատոր» հիմնադրամը «PMI Science գիտահետազոտական կենտրոն Հայաստան»-ի աջակցությամբ։

Ծրագրի նպատակն է տրամադրել ֆինանսական և համակարգային աջակցություն կիրառական հետազոտական նախագծերին, որոնք իրականացնում են առաջատար համալսարանների, գիտահետազոտական ինստիտուտների, նորարարական ստարտափների և ընկերությունների թիմերն ամբողջ աշխարհում։

Հետազոտական թիմերը կարող են ներկայացնել առաջարկներ հետևյալ առաջատար ոլորտներում՝

• նյութագիտություն, կայուն նյութեր, մագնիսական հատկություններով նյութեր,
• այլընտրանքային ոչ էլեկտրոնային էներգիայի աղբյուրներ,
• ջեռուցման և ջերմափոխանակման տեխնոլոգիաներ,
• նեյրոգիտություն, սենսորային փորձառություն, սենսորային տեխնոլոգիաներ,
• աերոզոլային գիտություն և տեխնոլոգիաներ,
• բուսաբանություն և ագրոնոմիա,
• թունաբանական մեթոդոլոգիաներ,
• կիրառական և փորձարարական ֆիզիկա,
• արդյունաբերական և համակարգերի ճարտարագիտություն, էլեկտրոնային ճարտարագիտություն, նախատիպավորում,
• մաթեմատիկա, մաթեմատիկական մոդելավորում, տվյալների գիտություն,
• անալիտիկ քիմիա։

Ծրագիրը բաց է այն հետազոտական թիմերի համար, որոնք համապատասխանում են հետևյալ չափանիշներին․

• Բաղկացած են 3-5 անդամից, որոնք ներկայացնում են առաջատար գիտահետազոտական ինստիտուտներ, համալսարաններ, նորարարական ստարտափներ կամ ընկերություններ: Նախապատվությունը կտրվի այն թիմերին, որոնց կազմում ընդգրկված են երիտասարդ հետազոտողներ (առնվազն 1 ուսանող):
• Կներկայացնեն hետազոտական նախագիծ, որը կարող է ունենալ կիրառական նշանակություն և համապատասխանում է առաջնահերթ ուղղություններին:

Նախընտրական փուլը հաղթահարած թիմերը կհրավիրվեն հարցազրույցի՝ ներկայացնելու իրենց նախագիծը։

Հետազոտական նախագծերը կարող են ունենալ իրականացման տարբեր ժամկետներ և ֆինանսավորման պահանջներ: Կախված իրականացման տևողությունից՝ ֆինանսավորումը կարող է լինել 1․1 - 5․8 միլիոն դրամի սահմաններում (ներառյալ բոլոր հարկերը և պարտադիր վճարները):

Բացի այդ՝ ծրագիրը հարթակ է տրամադրում գործընկերային հարաբերություններ կառուցելու և կիրառական հետազոտությունների արդյունքների առևտրայնացման հնարավորությունների համար:

Թիմերը նաև հնարավորություն կստանան մասնակցելու համայնքային բացառիկ միջոցառումների և համագործակցելու ոլորտի փորձառու մասնագետների ու մենթորների հետ։

Դիմելու համար անհրաժեշտ է կատարել հետևյալ քայլերը՝

• լրացրնել Առցանց հայտաձևը,
• պատրաստել և կցել թիմի բոլոր անդամների համապարփակ ինքնակենսագրականները,
• պատրաստել հետազոտական նախագծի առաջարկ՝ հետևելով Հավելված 1-ում նշված ուղեցույցներին,
• ներկայացնել աջակցության և հետազոտական սարքավորումների առկայության հաստատում ինստիտուտ(ներ)ի կողմից։ Ձևաթուղթը՝ այստեղ:

Բոլոր փաստաթղթերը պետք է ներկայացվեն անգլերենով։ Հայտաձևը լրացնելու համար անհրաժեշտ է ունենալ Google-ի օգտահաշիվ։

Հայտերի ներկայացման վերջնաժամկետն է 2023թ. հուլիսի 30-ը՝ ժ. 23։59 (Երևանի ժամանակով)։

Մեծ թվով հայտեր ստանալու դեպքում, ցավոք, ծրագրում չընդգրկվող թեկնածուների հետ հետադարձ կապ չի լինի։

Դիմելուց առաջ անպայման է կարդալ սույն Գաղտնիության ծանուցումը։

Աղբյուր՝ eif.am