ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

Բարձրագույն կրթության և գիտության կոմիտեի նախագահի հրամանով հաստատված աշխատանքային խմբերը այցելել են ևս երկու գիտական կազմակերպություն։ Մասնավորապես՝ 2024թ․ սեպտեմբերի 17-ին և 18-ին այցեր են իրականացվել համապատասխանաբար ՀՀ ԳԱԱ արևելեգիտության ինստիտուտ և ՀՀ ԳԱԱ Մ. Աբեղյանի անվան գրականության ինստիտուտ։

Նշենք, որ այցերի նպատակն է 2024 թվականի ընթացքում բազային և թեմատիկ ֆինանսավորմամբ իրականացվող ծրագրերի և թեմաների մշտադիտարկումը։  

Աշխատանքային խմբերը շրջայցեր են կատարել ինստիտուտներում՝ տեղում ծանոթանալով թեմատիկ ծրագրերի ղեկավարների գիտահետազոտական ուսումնասիրությունների գործընթացին։

ՀՀ ԳԱԱ արևելեգիտության ինստիտուտ շրջայցի ընթացքում ցույց են տրվել ստորաբաժանումներում առկա թեմատիկ և բազային ծրագրերի շրջանակում ձեռք բերված սարքավորումները, մասնավորապես՝ 2 սկաներ՝  Արևելագիտության ինստիտուտի գրադարանի թվայնացման համար, դյուրակիր համակարգիչներ ու տպիչ սարքեր, ձեռք բերված գրքերը։ Որպես գիտական արդյունք ներկայացվել են արդեն հրատարակված աշխատանքները։ 

ՀՀ ԳԱԱ Մ. Աբեղյանի անվան գրականության ինստիտուտում ներկայացվել է ծրագրերի և թեմաների կատարման ընթացքի, ստացված գիտական արդյունքների, ֆինանսական աջակցության գումարների օգտագործման մասին պայմանագրի առաջադրանքով, օրացուցային պլանով նախատեսված միջոցառումների, ինչպես նաև նախահաշվով նախատեսված ծախսերի կատարման վերաբերյալ տեղեկություն: 

Կոմիտեի աշխատանքային խմբի ներկայացուցիչները հորդորել են այսուհետ ևս ակտիվ մասնակցություն ունենալ ԲԿԳ կոմիտեի թեմատիկ նոր ծրագրերին, որոնք նպաստում են ոչ միայն գիտական ներուժի զարգացմանը, այլև հնարավորություն են տալիս բարելավելու շենքային և աշխատանքային պայմանները։