ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

Գառնիի տաճարի բակում օրերս կայացել է Ճարտարապետության և շինարարության Հայաստանի ազգային համալսարանի շրջանավարտների ավարտական դիպլոմների հանձման հանդիսավոր արարողությունը: Այս տարի համալսարանն ավարտել է շուրջ 650 շրջանավարտ:

Միջոցառումը մեկնարկել է ֆակուլտետային խորհրդանիշ-դրոշների փոխանցմամբ. շրջանավարտներն իրենց իմացության ու վարպետության դրոշները փոխանցեցին առաջինկուրսեցիներին:

Բացման հանդիսավոր արարողությունից հետո ՃՇՀԱՀ-ի շրջանավարտներին շնորհավորել և մասնագիտական ձեռքբերումներ են մաղթել ՀՀ կրթության, գիտության, մշակույթի և սպորտի նախարարի տեղակալ Ալֆրեդ Քոչարյանը, Տարածքային կառավարման և ենթակառուցվածքների նախարար Գնել Սանոսյանը, Քաղաքաշինության կոմիտեի նախագահ, ՃՇՀԱՀ հոգաբարձուների խորհրդի նախագահ Արմեն Ղուլարյանը, Կառուցապատողների Հայկական Ասոցիացիայի հիմնադիր և խորհրդի անդամ Վահե Պետրոսյանը, ՀՀ վաստակավոր և ժողովրդական նկարիչ ՃՇՀԱՀ պատվավոր պրոֆեսոր Հրանտ Թադևոսյանը, համալսարանի բարեկամները և այլ պատվավոր հյուրեր:

Ամփոփելով միջոցառումը՝ ՃՇՀԱՀ ռեկտոր Եղիազար Վարդանյանը ողջունել է ներկաներին և նշել, որ միջոցառման վայրը պատահական չէ ընտրված և այն իր մեջ ամփոփում և արտահայտում է համալսարանի գրեթե բոլոր մասնագիտությունները:

«Սիրելի՛ շրջանավարտներ, շնորհավորում եմ մասնագիտություն ստանալու և համալսարանը բարեհաջող ավարտելու այս, հիրավի, հիշարժան օրվա առթիվ: Համոզված եմ, որ մասնագիտական գործունեության բոլոր ոլորտներում դուք պահանջված եք, քանի որ ստացել եք հիմնավոր գիտելիքներ: Վստահեցնում եմ, որ մեր համալսարանը Ձեզ ուղեկից է լինելու և աջակցելու է մասնագիտական գործունեության ողջ ընթացքում»-, ասել է Եղիազար Վարդանյանը:

Անդրադառնալով առաջին կուրսի ուսանողներին՝ ռեկտորը վստահեցրել է, որ նրանք ստանալու են միջազգային չափանիշներին համապատասխան, որակյալ և հիմնավոր կրթություն, ունենալու են հիշարժան ուսանողական կյանք, հնարավորություն են ունենալու մասնակցելու միջազգային բազմաթիվ փոխանակման ծրագրերի:

Միջոցառման պաշտոնական մասի ավարտից հետո շրջանավարտների համար նաև համերգային ծրագիր է կազմակերպվել:

Աղբյուր՝ escs.am