ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

Այսօր ՀՀ ԿԳՆ գիտության պետական կոմիտեի նախագահը ՀՀ գիտությունների ազգային ակադեմիայում մասնակցեց  Հովհաննես Չեքիջյանի ծննդյան 85-ամյակին նվիրված գիտական նստաշրջանի բացման արարողությանը:

Պարոն Հարությունյանը շնորհավորեց սիրելի մաեստրոյին ծննդյան տարելիցի կապակցությամբ` մաղթելով առողջություն, ստեղծագործական նորանոր բարձունքներ և ամենայն բարիք.

«Թանկագին պարոն Չեքիջյան,

ՀՀ կրթության և գիտության նախարարության գիտության պետական կոմիտեի և անձամբ իմ անունից ջերմորեն շնորհավորում եմ Ձեզ` ծննդյան 85-ամյակի կապակցությամբ:

Դիրիժորական և մանկավարժական Ձեր բազմամյա գործունեությունը մեծ նպաստ է բերել մեր խմբերգային արվեստի զարգացմանը: Ձեր ղեկավարությամբ մեծ վարպետությամբ կատարվել են դասական և ժամանակակից կոմպոզիտորների ստեղծագործությունները, հայկական ժողովրդական երգեր, օպերաներից հատվածներ, որոնք, հանդիսանալով համաշխարհային երաժշտության անկրկնելի գոհարներ, տասնյակ տարիներ ոգևորել և կրթել են սերունդներ:

Անուրանալի է ինքնատիպ գեղարվեստական մտածողությամբ, կատարողական վարպետությամբ և արտիստիզմով աչքի ընկնող երաժշտական կյանքի հմուտ կազմակերպչի և մանկավարժի Ձեր վաստակը: Հայաստանի պետական ակադեմիական երգչախումբը` հռչակավոր Կապելլան, եղել և մնում է մեր ժողովրդի կողմից ամենասիրված երաժշտական կոլեկտիվներից մեկը:

Այսօր էլ Դուք շարունակում եք ստեղծագործական եռանդուն գործունեությունը, ինչի արդյունքում, վստահ եմ, ծնվելու են նոր գլուխգործոցներ` ի շահ մեր մշակութային գանձարանի հարստացման:

Մեկ անգամ ևս շնորհավորելով ծննդյան տարելիցի կապակցությամբ` մաղթում եմ Ձեզ, սիրելի մաեստրո, առողջություն, ստեղծագործական նորանոր բարձունքներ և ամենայն բարիք:»:

 

Տեղեկատվության և հասարակայնության հետ կապերի բաժին