ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

1. Ո՞վ կարող է դառնալ միջոցառման շահառու:

Շահառու կարող են դառնալ ՀՀ այն քաղաքացիները, որոնք ՀՀ ռեզիդենտ առևտրային կազմակերպության աշխատակից են առնվազն 2 տարի:

2. Նոր ստեղծված առևտրային կազմակերպության աշխատակիցը կարո՞ղ է դառնալ շահառու:

Ոչ: ՀՀ ռեզիդենտ առևտրային կազմակերպությունը պետք է ՀՀ-ում գոյություն ունենա առնվազն 5 տարի, և այդ 5 տարվա ընթացքում ունեցած լինի առնվազն 100 աշխատակից:

3. Արդյո՞ք այս կարգի շրջանակում պետության կողմից տրամադրվում է ամբողջական կրթաթոշակ:

Ոչ, պետությունը տրամադրում է ամեն տարվա համար առնվազն 10 մլն ՀՀ դրամ այն դեպքում, երբ առևտրային կազմակերպությունը պարտավորվում է տրամադրել կրթաթոշակի 50%-ը:

4. Արդյո՞ք օտարերկրյա ցանկացած բուհ ընդունվելիս կարող ենք դիմել փոխհատուցում ստանալու համար:

Ոչ: Խոսքն այն բուհերի մասին է, որոնք ընդգրկված են http://www.shanghairanking.com կայքի տվյալ տարվա ցանկերում, մասնավորապես՝ առաջին 65-ում՝ բակալավրի, առաջին 75-ում՝ մագիստրատուրայի կամ ասպիրանտուրայի պարագայում։ 

5. Ո՞ր դեպքում կարող է դադարեցվել կրթաթոշակի տրամադրումը:

Կրթաթոշակի տրամադրումը կարող է դադարեցվել, եթե ուսանողը կիսատ է թողնում ուսումը կամ տեղափոխվում է այնպիսի ուսումնական հաստատություն, որը չի բավարարում վերոնշյալ պայմաններին (ընդգրկված չէ http://www.shanghairanking.com կայքի տվյալ տարվա ցանկերում):

6. Ի՞նչ պարտավորություններ ունի կրթաթոշակի շահառու ուսանողը ուսման ավարտից հետո:

Կրթաթոշակի շահառու ուսանողը պարտավոր է ուսման ավարտից հետո առնվազն 3 տարի աշխատել տվյալ առևտրային կազմակերպությունում այն մասնագիտությամբ, որն ուսանել է:

7. Ի՞նչ հետևանքներ են առկա ուսումը կիսատ թողնելու, ուսման ավարտից հետո ՀՀ չվերադառնալու կամ ՀՀ վերադառնալուց հետո աշխատանքն այլ գործատուի մոտ շարունակելու դեպքում:

Նշված դեպքերում գործատուն պարտավորվում է ՀՀ պետական բյուջե վճարել կարգով սահմանված հրաժարագին: Միաժամանակ գործատուները, իրենց հայեցողությամբ, սովորողի անձնական պատասխանատվությանն առնչվող դրույթներ կարող են ներառել հանձնառության պայմանագրում, որը ուսումն սկսելուց առաջ կնքվում է գործատուի և ուսանողի միջև:

8. Կարո՞ղ է ուսանողը դառնալ սույն կարգի շահառու երկրորդ անգամ:

Նույն կրթական աստիճանով (օրինակ՝ բակալավր) սովորելու համար կրթաթոշակը տրամադրվում է միայն մեկ անգամ,  սակայն ուսանողը, որը բակալավրի կրթական աստիճանով ուսումնառության համար ստացել է կրթաթոշակ, կարող է ստանալ նաև մագիստրատուրայի և ասպիրանտուրայի համար:

Մանրամասն տե՛ս՝ այստեղ