Սեմինար ԳՊԿ-ում
Հուլիսի 22-ին ՀՀ ԿԳՆ գիտության պետական կոմիտեում տեղի ունեցավ սեմինար, որին մասնակցում էին Գիտատեխնիկական խորհրդի, Գիտության պետական կոմիտեի եւ գիտական կազմակերպությունների ներկայացուցիչներ:
Սեմինարը վարում էր ԳՊԿ նախագահ Ս. Հարությունյանը:
Առաջին զեկույցը՝ «Սահմանների/տարածքների անվտանգության պահպանման համակարգ՝ լայն հաճախային տիրույթում գործող (այդ թվում՝ քվազի-ստացիոնար) նանո մասշտաբի դիրքի շեղում գրանցող նոր տվիչների հիման վրա» թեմայով, ներկայացրեց ֆիզ.մաթ. գիտությունների դոկտոր Սամվել Գեւորգյանը («Ճշգրիտ տվիչներ/սարքավորումներ» (PSI) ՍՊԸ): Թեմայի շուրջ ծավալվեցին քննարկումներ, մասնավորապես, Գիտատեխնիկական խորհրդի անդամներ Կ. Կարապետյանի եւ Ա. Տեր-Մարտիրոսյանի մասնակցությամբ: Արդյունքում որոշվեց զեկույցում ներկայացված հարցն ընդգրկել Գիտատեխնիկական խորհրդի առաջիկա նիստի օրակարգում:
Երկրորդ զեկույցը վերաբերում էր Քվանտային ինֆորմացիոն տեխնոլոգիաներին: Թեման ներկայացրեց ֆիզ.մաթ. գիտությունների թեկնածու Սայաթնովա Թամարյանը (Ա.Ի. Ալիխանյանի անվան ազգային գիտական լաբորատորիա): Նրա ներկայացրած նախագծի նպատակն է մշակել քվանտային Թելեփորթ կոչվող երեւույթի վրա հիմնված հաղորդակցության տեխնոլոգիա, որով փոխանցվող ինֆորմացիան սկզբունքորեն անհնար է կրկնօրինակել, գաղտնալսել կամ աղավաղել:
Այս թեման նույնպես աշխույժ քննարկումների առիթ դարձավ:
Տեղեկատվության եւ հասարակայնության հետ կապերի բաժին