Քենդլ-ում կգործի նոր կրթական և վերապատրաստման կենտրոն
![](thumbs/460x/images/2018-07/6995e9eadfad50f9efa91a3e6c7320c5.jpg)
![image description](thumbs/460x330/attachments/2018-07/6457155722ad806d086b7b00e1a7df41.jpg)
![image description](thumbs/460x330/attachments/2018-07/d53a5c6d8a867a4af171ded7ef071216.jpg)
![image description](thumbs/460x330/attachments/2018-07/7c307c4b2f00b6158b35b08615c13afa.jpg)
![image description](thumbs/460x330/attachments/2018-07/3f32745fff702966a43ca1e0b5ef1a7a.jpg)
Հուլիսի 18-ին «Բաց դռների օր ՔԵՆԴԼ-ում» միջոցառման շրջանակներում փոխըմբռնման հուշագիր կնքվեց Rohde & Schwarz Int. GmbH-ի (Գերմանիա) և «ՔԵՆԴԼ» ՍՀԻ միջև: Ստորագրման արարողությանը ներկա էին ՀՀ նախագահ Արմեն Սարգսյանը, ՀՀ ԿԳ նախարարի տեղակալ Հովհաննես Հովհաննիսյանը և Գիտության կոմիտեի նախագահ Սամվել Հարությունյանը:
Հուշագիրը նվիրված է ՔԵՆԴԼ-ում նոր կրթական և վերապատրաստման կենտրոնի ստեղծմանը: Հուշագրում մասնավորապես նշված է, որ, հաշվի առնելով ժամանակակից արագացուցիչների համար հեռահաղորդակցման, ԳԲՀ և միկրոալիքային սարքերի բաղադրիչ մասերի զարգացման, առաջխաղացման և շահագործման կարևորությունը, այս ուղղություններով համագործակցումը փոխշահավետ է և կհանգեցնի նոր տեխնիկական ու գիտական ձեռքբերումների:
Երկու կողմն էլ համաձայն են, որ վերոնշյալ նպատակներին կարելի է հասնել Քենդլ ինստիտուտում ժամանակակից հեռահաղորդակցման և ղեկավարման, ԳԲՀ և միկրոալիքային սարքերով զբաղվող կրթական և վերապատրաստման կենտրոն հիմնելով: Նոր կենտրոնը բաց կլինի Հայաստանի, ինչպես նաև ՀՀ սահմաններից դուրս գտնվող գիտական ու կրթական հաստատությունների համար և կնպաստի ընդհանուր հետաքրքրությունների բնագավառներում գիտնականների և ճարտարագետների նոր սերնդի ստեղծմանը»:
Այս փոխըմբռնման հուշագիրը նպատակ ունի զարգացնել և ընդլայնել երկու կողմերի միջև համագործակցության շրջանակը՝ փոխշահավետ ծրագրերի, նախագծերի և բիզնես առաջարկների համար:
Հիշեցնենք, որ Rohde & Schwarz Int. GmbH-ը կապի, տեղեկատվության և անվտանգության ոլորտներում առաջատար դիրք ունեցող համաշխարհային տեխնոլոգիական ընկերություն է: Քենդլ-ը գիտահետազոտական ինստիտուտ է, որը վերջերս ավարտին է հասցրել ժամանակակից ավտոմատացման և ղեկավարման համակարգ ունեցող ԱՐԵԱԼ լազերով ղեկավարվող էլեկտրոնային արագացուցիչը: