ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

ՀՀ ԿԳՆ գիտության պետական կոմիտեն եւ Ֆրանսիայի գիտական հետազոտությունների ազգային կենտրոնը 2009 թվականի ապրիլի սկզբին հայտարարեցին գիտական հետազոտությունների ոլորտում երկկողմ գործակցության ծրագրերի բաց մրցույթ:

Մրցույթն անցկացվելու էր 2009 թվականի հունվարի 20-ին Ֆրանսիայում կնքված «Գիտական համագործակցության մասին» պայմանագրի շրջանակներում եւ ընդգրկելու էր ճշգրիտ, բնական, հասարակագիտական եւ հումանիտար գիտությունների բոլոր բնագավառներում իրականացվող հիմնարար եւ կիրառական հետազոտությունները:

Մրցույթին հայտ ներկայացնելու իրավասություն ունեին Հայաստանում գիտական եւ գիտատեխնիկական գործունեություն իրականացնող կազմակերպություններն ու Ֆրանսիայի գիտական հետազոտությունների ազգային կենտրոնի միավորումները՝ համատեղ ծրագրեր ներկայացնելու միջոցով:

 

Առաջարկների ընդունման ժամկետն ավարտվել է: Ստացված 16 հայտերի տեխնիկական փորձաքննության արդյունքում պարզվել է, որ հայտերի գերակշիռ մասը ներկայացված է ՀՀ ԳԱԱ ինստիտուտների կողմից, 3 հայտ ներկայացրել է Երեւանի պետական համալսարանը (ՀՀ կրթության եւ գիտության նախարարություն), 2 հայտ՝ Երեւանի ֆիզիկայի ինստիտուտը (ՀՀ էկոնոմիկայի նախարարություն):

 

Մրցութային հայտերը դեռեւս պետք է գնահատվեն անկախ փորձագետների կողմից՝ հաշվի առնելով ծրագրերի որակը, գիտական նորույթը, երկկողմ գործակցության զարգացման հեռանկարները, երիտասարդ կադրերի ներգրավվածությունը, ինչպես նաեւ Եվրոպական միության կաղապարային ծրագրերում համատեղ հանդես գալու հնարավորությունը:

Վերջնական որոշումը կայացնելու իրավունք ունի ՀՀ ԿԳՆ գիտության պետական կոմիտեի եւ Ֆրանսիայի գիտական հետազոտությունների ազգային կենտրոնի միասնական խորհուրդը:

 

Տեղեկատվության եւ հասարակայնության հետ կապերի բաժին